வாழ்க்கையின் ஆழமான அனுபவங்களில் துன்பமும் அடங்கியிருக்கிறது. சிகிச்சை என்பது உங்களுடனான உறவை விரிவுபடுத்தும் மற்றும் ஆரோக்கியமான பகுத்தறிவை வளர்க்கும் சூழலாக இருக்க முடியும் என்று நான் நம்புகிறேன். ஒரு சிகிச்சையாளராக உங்கள் வாழ்க்கையின் பல பரிமாணங்களைப் பார்த்து, புரிந்து கொள்வதற்கு நமக்கான ஓர் சூழலை உருவாக்குகிறேன். இவற்றுள் உங்கள் உணர்ச்சிகள், எண்ணங்கள், நடத்தைகள்; உங்களைப் பற்றிய கடந்த கால, நிகழ்கால மற்றும் எதிர்கால விஷயங்கள்; மனம், உடல் மற்றும் ஆன்மா உள்ளிட்டவை அடங்கும். உங்கள் வாழ்க்கையை வாழ்வது நீங்கள்தான் என்பதை நான் மதிப்பதோடு, நாம் மேற்கொள்ளும் சிகிச்சையில் உங்களின் உள்ளார்ந்த அறிவை நீங்கள் பகிர்ந்து கொள்வதையும் வரவேற்கிறேன்.  ஆழ்ந்த கண்ணோட்டங்களைத் தரக்கூடிய வகையிலும், உணர்வுகளைப் பகிர்ந்து மன அழுத்தத்தைக் குறைக்கும் வகையிலும் மகிழ்ச்சியூட்டும் தன்னம்பிக்கையைத் தரும் சிகிச்சை சூழலை உருவாக்கிட முயற்சிக்கிறேன். உங்கள் அனுபவங்களைப் புரிந்துகொள்ள மற்றும் நீங்கள் மன ரீதியாக குணமடைய உதவும் வகையில் உடல், உணர்ச்சி, சிந்தனை மற்றும் வெளிப்பாட்டுக் கலை சார்ந்த முறைகளை எனது ஆலோசனை சிகிச்சையில் சேர்த்து பயன்படுத்துகிறேன்.

நியூயார்க் பல்கலைக்கழகத்தில் மனநல ஆலோசனைத் துறையில் முதுகலைப் பட்டம் பெற்றுள்ள நான், பால்புதுமையினரை (LGBTQ*) அங்கீகரிக்கும் சிகிச்சையில் (Affirming Therapy) சிறப்புப் பட்டமும் பெற்றுள்ளேன். புது தில்லியில் உள்ள ஃபோர்ட்டிஸ் மருத்துவமனை மற்றும் யுனெஸ்கோ சிஐடி (சர்வதேச நடனக் குழு) ஆகியவற்றால் ஒருங்கிணைக்கப்பட்ட ஒரு கூட்டுத்திட்டத்தின் மூலம் வெளிப்பாட்டுக் கலை சார்ந்த சிகிச்சை (Expressive Arts-Based Therapy) துறையிலும் முறையான பயிற்சி பெற்றுள்ளேன். 2017-ஆம் ஆண்டு, இந்தியாவில்  ‘Okay; Not Okay’ என்ற பெயரில் ஒரு கூட்டு மனநல விழிப்புணர்வுத் திட்டத்தை நான் நிறுவினேன். காட்சி ரீதியான கலை மற்றும் கதை சொல்லல் ஆகியவற்றின் அடிப்படையில் அமைந்த இத்திட்டம், மனநல ஆரோக்கியம் குறித்து மக்கள் மத்தியில் நிலவிய தயக்கங்களையும் தனிமையையும் போக்கி, மனநலம் குறித்து ஆரோக்கியமான உரையாடல்களை மேற்கொள்வதற்கான சூழலை உருவாக்குவதை நோக்கமாகக் கொண்டிருந்தது. இத்திட்டத்தின் மூலம் சமூகப் பிணைப்பும், அவற்றின் ஆக்கப்பூர்வமான செயல்பாடுகளும் சுகாதார சேவைகளின் அணுகலை எளிதாக்குவதில் வகிக்கும் பங்கை நான் புரிந்து கொண்டேன். இதன் மூலம் மனித உறவுகள் குறித்து எனக்குக் கிடைத்த எனது பார்வைகளை, இரண்டு TEDx உரைகள் வாயிலாகப் பகிர்ந்து கொள்ளவும், உலகளவில் மாற்றத்தை ஏற்படுத்தும் சமூகத்தில் இணையவும் எனக்கு வாய்ப்பு கிடைத்தது.

தீராத வலியுடன் பால்புதுமையின இந்தியப் பெண்மணியாக நான் பெற்ற தனிப்பட்ட அனுபவம், எனக்கு நுணுக்கமான நகைச்சுவை உணர்வையும் ஆழ்ந்த பரிவையும் அளித்துள்ளது. தற்போது எனது தாயகமாக விளங்கும் நியூயார்க் நகரம், நான் வசிக்கும் மூன்றாம் நாட்டின் நான்காவது நகரமாகும். கலாச்சாரப் பன்முகத்தன்மையும் நரம்பியல் வளர்ச்சியில் இருக்கும் வேறுபாடுகளும் எனது சிகிச்சைத் தத்துவங்களின் அடிப்படை அம்சங்களாகும். இவை எனது சொல்லகராதியில் இணைவதற்கு முன்பே, எனது வாழ்வியல் அனுபவங்களாக இருந்துள்ளன. ஆங்கிலம் மட்டுமின்றி, தமிழ் மற்றும் இந்தி ஆகிய மொழிகளிலும் நான் சிகிச்சை சேவைகளை வழங்குகிறேன்.

பணிபுரியாத நேரங்களில், புத்தகம் வாசிப்பது, பல விதமான இசைகளுக்கு நடனமாடுவது, ஓவியம் தீட்டுவது மற்றும் படங்கள் தொகுப்பது அல்லது இயற்கையோடு இணைந்து நேரத்தைச் செலவிடுவது ஆகியவற்றில் ஆர்வம் கொண்டு, அவற்றில் நேரம் செலவிடுகிறேன்.